पाल्पा, फागनु १५
आज फागुन १५ गते । देश तथा विदेशमा रहेका मगर संघ तथा संघका भातृसंगठनहरुले ४० औ मगर एकता दिवस मनाउँदैछन् । २०३९ साल फागनु १५ गते स्वर्गिय हेम बहादुर पुनको अध्यक्षतामा तनहुँमा नेपाल लाङ्घाली परिवार संघको प्रथम अधिबेशन भएको थियो । यसैको संझनामा मगर संघ र यस संग सम्वन्धित संघ सँस्थाहरुले एकता दिवसको रुपमा बिभिन्न कार्यक्रमको आयोजना गरेका हुन् ।
मगर एकता, भाषा, संस्कृतिको रक्षा र अधिकार प्राप्तीका लागी स्थापना भएको लाङ्घाली परिवारसंघ, पछि नेपाल मगर संघमा परिवर्तन भएको मगर संघका संस्थापक महासचिब सुरेश आले मगरले जानकारी दिनुभयो । मगर संघका केन्द्रिय अध्यक्ष नबिन रोकामगरका अनुसार २०१२ सालमै मगर समाज सुधार समितिको नाउँमा गुल्मीको भार्सेमा मगरहरुको पहिलो संगठन बनेको भनिएपनि मगर संघले २०३९ साल फागुन १५ लाई नै संघको स्थापना दिवसको रुपमा मनाउँदै आएको छ ।
मगरबाहुल्य स्थानीय तहले दिए सार्वजनिक विदा
४० औं राष्ट्रिय मगर एकता दिवसका अवसरमा आज देशभरका मगर बाहुल्य स्थानीय तहमा सार्वजनिक विदा दिइएको छ । उता ५२ प्रतिशत बढी मगर जनजातिको बसोवास रहेको पाल्पामा १० वटै स्थानीय तहरुले सार्वजनिक विदा दिएका छन् । मगर संस्कृतिको संरक्षण सम्वद्र्धन गर्दै उनीहरुले मनाउने पर्वका रुपमा सार्वजनिक विदा दिएको पालिकाहरुले विज्ञप्ती मार्फत जनाएका हुन् ।
शोकमा मगर संघ
यसैविच यस वर्षको ४० औं राष्ट्रिय मगर एकता दिवसलाई देशभरका अधिकांस मगर संघ तथा तिनका भातृसंस्थाहरुले शोकको रुपमा मनाउने जनाएका छन् । नेपाल मगर संघका पूर्बअध्यक्ष झक बहादुर थापाको निधन भएको दुखःद समय भएकाले ४० औ राष्ट्रिय एकता दिवसलाई शोकको रुपमा मनाइने मगर संघले जनाएको छ । संघका पूर्ब अध्यक्ष थापाको यही फागुन ११ गते उपचारको क्रममा काठमाण्डौमा निधन भएको थियो ।
ट्रेन्डिङ
ट्रेन्डिङ