पाल्पा, असार ५
स्थानीय सरकारको प्रभावकारी सेवा प्रवाहका लागि आधुनिक र व्यवस्थित प्रशासनिक पूर्वाधार अपरिहार्य मानिन्छ। यही आवश्यकतालाई आत्मसात् गर्दै पाल्पाको माथागढी गाउँपालिकाले आफ्नै अत्याधुनिक प्रशासकीय भवन निर्माणलाई तीव्र गतिमा अघि बढाएको छ। निर्माण सुरु भएको झण्डै १४ महिनामै भवनको करिब ६० प्रतिशत भौतिक प्रगति हासिल भएपछि गाउँपालिकाले निर्धारित समयमै निर्माण सम्पन्न हुने विश्वास व्यक्त गरेको छ।
हाल गाउँपालिकाका विभिन्न शाखा छुट्टाछुट्टै भवनबाट सञ्चालन भइरहेका छन्। यसका कारण सेवाग्राहीले एउटै कामका लागि विभिन्न स्थान धाउनुपर्ने बाध्यता छ भने कार्यालय व्यवस्थापनमा समेत अतिरिक्त खर्च भइरहेको छ। निर्माणाधीन प्रशासकीय भवन सम्पन्न भएपछि यी समस्या अन्त्य हुने र सबै सेवा एउटै परिसरबाट प्रदान गर्न सकिने अपेक्षा गरिएको छ। गाउँपालिकाले २०८२ चैत २२ गते नेरिसा–जेसिका–साहिल जेभी, काठमाडौंसँग भवन निर्माणको सम्झौता गरेको थियो। गाउँपालिकाका इन्जिनियर धर्मेन्द्र कुमार यादवका अनुसार मूल्य समायोजनबाहेक मूल्य अभिवृद्धि कर (भ्याट) सहित ६ करोड ७६ लाख ८५ हजार ४८८ रुपैयाँ ८५ पैसामा निर्माण सम्झौता गरिएको हो। सम्झौताअनुसार भवन २०८३ चैत २२ गतेभित्र निर्माण सम्पन्न गर्नुपर्नेछ।
वडा नम्बर ४ झडेवाको चीउरेमाटीमा निर्माण भइरहेको भवनका लागि स्थानीय विष्णुकुमारी जिसी, श्यामबहादुर जिसी र मीनाकुमारी जिसीले कुल आठ रोपनीभन्दा बढी जग्गा निःशुल्क उपलब्ध गराएका छन्। गाउँपालिकाका अध्यक्ष यमबहादुर चिदीका अनुसार स्थानीयको सहयोग र आवश्यक कानुनी प्रक्रिया पूरा भएपछि भवन निर्माणको काम अघि बढाइएको हो। स्थानीयको यस्तो योगदानले विकास निर्माणमा समुदायको अपनत्व र सहकार्यको उदाहरण प्रस्तुत गरेको उहाँको भनाइ छ। गाउँपालिकाका अनुसार हालसम्म भवनको करिब ६० प्रतिशत भौतिक र ५२ प्रतिशत वित्तीय प्रगति भएको छ।
निर्माण कम्पनीले हालसम्म तीन करोड ५४ लाख १० हजार रुपैयाँ भुक्तानी लिइसकेको गाउँपालिकाका प्रवक्ता शंकर दर्लामीले जानकारी दिएका छन्। भवन निर्माणको लागतमध्ये ६० प्रतिशत स्थानीय पूर्वाधार विभाग र ४० प्रतिशत गाउँपालिकाको साझेदारीमा व्यहोर्ने व्यवस्था गरिएको छ। निर्माणस्थलमा अहिले स्टोर, शौचालय र चमेना गृह निर्माण भइरहेको छ। मुख्य भवनको तेस्रो तलाको ढलान सम्पन्न भइसकेको छ भने प्लास्टरको काम तीव्र रूपमा अगाडि बढिरहेको छ। निर्माण कम्पनीले निर्धारित समयभित्रै भवन हस्तान्तरण गर्ने प्रतिबद्धता जनाएको छ।
निर्माण सम्पन्न भएपछि भवनमा करिब ५५ वटा कोठा रहनेछन्। अपाङ्गमैत्री र बालमैत्री संरचनासहित भूकम्पप्रतिरोधी मापदण्डअनुसार निर्माण भइरहेको भवनमा व्यवस्थित पार्किङ र करिब ३०० जना अट्ने सभाहल पनि रहनेछ। यी पूर्वाधारले गाउँपालिकाको प्रशासनिक क्षमता मात्र होइन, विभिन्न सार्वजनिक कार्यक्रम सञ्चालन गर्नसमेत सहज वातावरण तयार गर्ने अपेक्षा गरिएको छ।
गाउँपालिकाका उपाध्यक्ष विष्णु लुङ्चेका अनुसार एकीकृत प्रशासकीय भवन सञ्चालनमा आएपछि सेवाग्राहीले एउटै स्थानबाट सबै सेवा प्राप्त गर्नेछन्। यसले नागरिकको समय र खर्च बचत गर्नुका साथै कर्मचारीबीच समन्वय बढ्ने, प्रशासनिक कार्यसम्पादन प्रभावकारी बन्ने र सेवा प्रवाह थप गुणस्तरीय हुने विश्वास गरिएको छ।
संघीय संरचनापछि स्थानीय तहको जिम्मेवारी विस्तार हुँदै जाँदा त्यसअनुसारको प्रशासनिक पूर्वाधार निर्माण पनि आवश्यक बन्दै गएको छ। माथागढी गाउँपालिकाको निर्माणाधीन प्रशासकीय भवन केवल एउटा सरकारी कार्यालय मात्र होइन, सुशासन, प्रभावकारी सेवा प्रवाह र नागरिकमैत्री स्थानीय सरकार निर्माणको दीर्घकालीन आधारका रूपमा हेरिएको छ। निर्धारित समयमै निर्माण सम्पन्न भएमा यसले माथागढीका नागरिकलाई सहज, छरितो र गुणस्तरीय सार्वजनिक सेवा उपलब्ध गराउने नयाँ युगको सुरुआत गर्ने अपेक्षा गरिएको छ।
