खानेपानीको समस्या समाधानमा सक्रिय स्थानीय सरकार
पाल्पा, असार १५
पालिका भित्र रहेको खानेपानी समस्या समाधानका लागी माथागढी गाउँपालिका सक्रिय रुपमा अघि बढेको छ । यसैको पछिल्लो उदाहरण हो, माथागढी गाउँपालिका वडा नम्बर ७ को दुर्गम बस्तीको रुपमा रहेको रहवासको खानेपानीमा भएको पहुँच । माथागढी गाउँपालिकाको आर्थिक वर्ष २०८२।०८३ मा विनियोजित ६ लाख रुपैंया बराबरको बजेट र स्थानीय उपभोक्ताहरुको श्रमदानमा खानेपानी आयोजना सम्पन्न भएपछि गाउँलेलाई सहज भएको छ । खानेपानी अभावमा स्थानीयहरुलाई समस्या रहेको र गाउँबाट टाडा लिनजानुपर्ने बाध्यता रहेकोमा खानेपानी आयोजना निर्माणसँगै एक घर एक धारा जडान भएको गाउँपालिकाले जनाएको छ । बादुर खोला सोलार लिफटिङ्ग खानेपानी आयोजना मार्फत गाउँका ३० घरधुरी र एक चर्चमा खानेपानी पहुँच पुगेको उपभोक्ता समितिका अध्यक्ष चन्द्र बहादुर सारुले जानकारी दिनुभयो ।
गाउँपालिकाको एक घर एक धारा अभियान अन्तगर्त यहाँको खानेपानीलाई व्यवस्थित गर्नको लागि पालिका स्तरीय बजेट विनियोजन गरेर काम गरिएको गाउँपालिकाका अध्यक्ष यमबहादुर चिदीले जानकारी दिनुभयो । भौगोलिक रुपमा टाडा भएता पनि पालिकाले सबैलाई समान तवरले समस्याको आधारमा बजेट विनियोजन गर्ने र सोही अनुसारको कार्यक्रमहरु संचालन गर्दै आइरहेको उहाँको भनाई छ । माथागढी गाउँपालिकाका वडा नम्बर १ देखि ८ सम्म दर्जनौँ खानेपानी आयोजनाहरू सञ्चालनमा आएका छन् । तीमध्ये कतिपय योजनाहरू सम्पन्न भइसकेका छन् भने केही अझै निर्माणाधिन अवस्थामा छन् ।
