पाल्पा, असार १४
३ सय बढी कृषकलाई हाते ट्याक्टर प्रदान गरेको पाल्पाको माथागढी गाउँपालिकाले कृषकलाई हाते ट्याक्टर मर्मतको समेत तालिम दिएको छ । पालिकाभरी ८ वडामा रहेका किशानहरुलाई सीपप्रविधि सिकाई कृषि पेशामा ब्यवशायीक र आत्म निर्भर बनाउन मर्मतको समेत तालिम दिएको गाउँपालिकाका अध्यक्ष यम बहादुर चिदिले जानकारी दिनुभयो । निशुल्क रुपमा प्रदान गरिएको हाते ट्याक्टरको प्रयोगमा सहज होस भनेर तालिम दिइएको पालिकाले जनाएको छ ।
४ वर्षको अवधिमा ३ सय बढी किसानलाई हातेट्याक्टर वितरण गरेको र त्यसको प्रयोगमा आउने समस्या सुल्झाउन सहिलोका लागी तालिम दिइएको अध्यक्ष चिदीले बताउनुभयो । प्राबिधिक शिक्षा तथा व्यावसायिक तालिम परिषद -सिटिइभिटि ) अन्तर्गत कोरिया नेपाल बहुप्राविधिक शिक्षालयको आयोजना तथा माथागढी गाउँपालिकाको सहकार्य र समन्वयमा पावर टिलर मर्मत तालिम दिइएको हो । माथागढी ३ का वडा अध्यक्ष तथा सामाजिक विकास समितिका संयोजक तेज बहादुर घर्तीका अनुसार ३९० घण्टा -६५ दिने) तालिम दिइएको हो । ग्रामीण क्षेत्रका युवाहरुलाई नयाँ अवसर प्रदान गर्ने विश्वासका साथ तालिम दिएको संयोजक घर्तीले बताउनुभयो ।
किसानहरुलाई व्यवसायिक बनाउन हातेट्याक्टर, विउ, प्लाष्टिक टनेल, मल्चिंग लगायतका कृषि उपकरण र औजारहरु प्रदान गर्दै आएको गाउँपालिकाका प्रवतmा शंकर दर्लामीले जानकारी दिनुभयो । किसानलाई उत्पादनमा आधारित अनुदान समेत प्रदान गर्दै आएको पालिकाले वडा नं. १, २,३ लाई तरकारी पकेट क्षेत्र, ४ लाई काफल र खुर्सानी पकेट क्षेत्र ५ लाई दालचिनी, ६,७, ८ मा समेत कृषि र पशुपालनको कार्यक्रममा सहयोग गर्दे आएको दर्लामीले जानकारी दिनुभयो ।
