काठमाडौं । राजधानीको तीनकुनेमा शुक्रबार पूर्वराजाको समर्थनमा भएको हिंसात्मक प्रदर्शनमा संलग्न भएको आरोपमा पक्राउ परेका राजावादी नेता–कार्यकर्तामाथि आज अनुसन्धानका लागि म्याद थप हुने भएको छ ।
पक्राउ परेका राप्रपाका उपाध्यक्ष रवीन्द्र मिश्र, महामन्त्री धवलशमशेर राणा, ‘राजसंस्था पुनस्र्थापनाका लागि संयुक्त जनआन्दोलन समिति’ का प्रवक्ता स्वागत नेपाल, शाही युवा शक्ति नेपालका अध्यक्ष पशुपति खड्का, धर्मगुरु पुष्कर खतिवडासहित ९ जनाविरुद्ध आज अनुसन्धानका लागि म्याद थप हुने भएको हो ।
प्रहरीले उनीहरूलाई ‘राज्यविरुद्धको अपराध कसुर’ अन्तर्गत कारबाही अघि बढाउने तयारी गरेको छ । शुक्रबारको प्रदर्शनमा हिंसात्मक झडप भएपछि प्रहरीले ११३ जनालाई पक्राउ गरेको थियो ।
प्रहरीले आवश्यक अनुसन्धानपछि अन्य पक्राउ परेकाहरूलाई पनि संगठित अपराध, आगजनी, ज्यान मार्ने उद्योग जस्ता विभिन्न अभियोगमा कानुनी प्रक्रिया अघि बढाउने जनाएको छ । प्रदर्शनलाई उग्र बनाउने मुख्य योजनाकार मानिएका दुर्गा प्रसाईँ भने फरार रहेका छन् ।
