पाल्पा, असार ९
पाल्पाको झडेवा फाँटमा पुल–कल्भर्ट निर्माण सम्पन्न भएपछि स्थानीय बासिन्दालाई आवागमनमा सहज भएको छ। माथागढी गाउँपालिका वडा नं. ४ अन्तर्गत पर्ने उक्त क्षेत्रमा दलदले भूभाग, खोला तथा वर्षायाममा जम्ने पानीका कारण पैदलयात्री तथा सवारी साधन सञ्चालनमा समस्या हुने गरेको थियो। यो सडक गाउँपालिकाको निर्माणाधीन प्रशासनिक भवन तथा झडेवाको मुख्य क्षेत्रसम्म पुग्ने महत्वपूर्ण मार्ग हो।
स्थानीय समाजसेवी फनबहादुर दर्लामीले निःशुल्क तीन आनाभन्दा बढी जग्गा उपलब्ध गराएपछि पुल–कल्भर्ट निर्माण सम्भव भएको वडा अध्यक्ष तथा गाउँपालिकाका प्रवक्ता शंकर दर्लामीले जानकारी दिनुभयो। गाउँपालिकाको २५ लाख रुपैयाँको लागतमा योजना सम्पन्न गरिएको हो। स्थानीय तथा सवारी चालक मदन रानाले पुल बनेपछि आफूहरूलाई ठूलो राहत मिलेको बताउनुभयो। उहाँका अनुसार सामान्य वर्षा हुँदा पनि सवारी साधन वारपार गर्न कठिन हुने, गाडी फस्ने र सामानसमेत क्षति हुने समस्या थियो। “धेरै पटक गाडी फसेका थिए, सामान बिग्रिएका थिए। अहिले पुल बनेपछि निकै सहज भएको छ,” उहाँले भन्नुभयो।
स्थानीय अभिभावकहरूले पनि यसअघि विद्यार्थीलाई विद्यालय पठाउन कठिनाइ हुने गरेकोमा अब ढुक्क भएर बालबालिकालाई विद्यालय पठाउन थालेको बताएका छन्। जग्गादाता फनबहादुर दर्लामीले जनताको समस्या देखेर निःशुल्क जग्गा उपलब्ध गराएको र त्यसपछि गाउँपालिकाले पुल निर्माण गरेको बताउनुभयो। पुल–कल्भर्ट सञ्चालनमा आएसँगै निर्माणाधीन गाउँपालिकाको प्रशासनिक केन्द्रसम्मको पहुँच सहज बनेको छ भने आसपासका बस्तीका नागरिकलाई दैनिक आवागमन तथा कामकाजमा समेत ठूलो सुविधा पुगेको स्थानीयवासीले बताएका छन्।
