पाल्पा, असार ८
पाल्पाको झडेवामा निर्माणाधीन १५ शैयाको आधारभूत अस्पताल भवन निर्माण कार्य अन्तिम चरणमा पुगेको छ। झडेवा मा निर्माण भइरहेको अस्पतालको भवनको अधिकांश काम सम्पन्न भइसकेको गाउँपालिकाले जनाएको छ। गाउँपालिकाले २०७८ जेठ २७ गते प्राकृतिक निर्माण सेवासँग करिब १२ करोड रुपैयाँ लागतमा २०८१ जेठभित्र निर्माण सम्पन्न गर्ने गरी ठेक्का सम्झौता गरेको थियो। विभिन्न प्राविधिक कारणले काममा ढिलाइ भएपछि आयोजनाको म्याद थप गरी २०८३ असारसम्म हस्तान्तरण गर्ने लक्ष्य राखिएको छ। साविक स्वास्थ्य चौकी रहेको ९ रोपनी क्षेत्रफलमा निर्माण भइरहेको दुईतले अस्पताल भवनको सम्पूर्ण संरचनागत काम सम्पन्न भइसकेको स्वास्थ्य शाखा प्रमुख केशव जिसीले जानकारी दिनुभयो। अस्पताल सञ्चालनका लागि आवश्यक विद्युत् क्षमता विस्तार तथा एसी जडानलगायतका काममा समय लागेकाले सेवा सञ्चालनमा ढिलाइ भएको उहाँको भनाइ छ। गाउँपालिकाका प्रवक्ता तथा वडा नं. ४ का अध्यक्ष शंकर दर्लामीका अनुसार स्वास्थ्य तथा जनसंख्या मन्त्रालयको स्थानीय तहमा अस्पताल भवन निर्माण गर्ने योजना अन्तर्गत माथागढीमा अस्पताल निर्माण गरिएको हो।
प्रदेश सरकारले एक जना चिकित्सकसमेत खटाइसकेको गाउँपालिकाले जनाएको छ। गाउँपालिका अध्यक्ष यमबहादुर चिदीका अनुसार अस्पतालमा नवौँ तहका चिकित्सकको नेतृत्वमा ३० जना स्वास्थ्यकर्मीको दरबन्दी रहनेछ। अस्पतालबाट ओपीडी, प्रयोगशाला, एक्स–रे, आयुर्वेद, दन्त उपचार, आकस्मिक, अन्तरङ्ग, बिरामी भर्ना तथा फार्मेसी सेवा उपलब्ध गराइनेछ। अस्पताल सञ्चालनमा आएपछि माथागढी गाउँपालिकाका झडेवा, गोठादी, हात्तिलुङ, रहवास, बहादुरपुर तथा कसेनी क्षेत्रका नागरिकले स्थानीय स्तरमै स्वास्थ्य सेवा पाउनेछन्। यसले सामान्य उपचारका लागि तानसेन र बुटवल जानुपर्ने बाध्यता अन्त्य हुने विश्वास गाउँपालिका अध्यक्ष चिदीले व्यक्त गर्नुभयो।
