पाल्पा, पौष २८
पाल्पाका सबै स्थानीय तहलाई कार्यक्षेत्र बनाएर संचालन भैरहेको मुक्तिनाथ कृषि बहुउद्धेश्यीय सहकारी संस्था पाल्पाको सातौ बार्षिक साधारण सभा तथा तेस्रो अधिबेशन सम्पन्न भएको छ । गत आर्थिक बर्षमा ६ करोड बढी कारोवार गर्न सफल भएको सहकारीमा ७ सय ९८ जना शेयर सदस्य रहेका छन् । ३ करोड ३६ लाख ९१ हजार लगानी गर्दे ३ करोड ४० लाख ७० हजार रुपैया बचत रकम संकलन गरेको छ । सहकारीले कृषिमा १८ लाख, व्यापारमा २ करोड ७५ लाख, घर जग्गा तथा घर निर्माणमा १३ लाख ८३ हजार, हायर पर्चेजमा ३० लाख २६ हजार रुपैया लगानी गरेको जनाएको छ । साधारणसभा लाई सम्वोधन गर्दै कार्यक्रममा प्रमुख अतिथी पाल्पा उधोग वाणिज्य संघका अध्यक्ष राजु महर्जनले जिल्लाका स साना उधोग व्यबसायहरु लाई प्रवद्र्धन गर्ने काम सहकारीले गर्दै आएको बताउनुभयो । ठुला बैंकहरुले ठुलो लगानीलाई मात्रै प्रोत्साहन गर्दै आएको भन्दै उहाँले सहकारीहरुले आफै बचत गर्ने र कारोवारको लागी ऋण पनि दिने भएकाले पनि स साना घरेलु तथा कुटिर उधोगको लागी सहकारीको सहयोग उल्लेखनिय रहेको बताउनुभयो । ठुला बैकहरु बाट अझैपनि कृषि केन्द्रित लगानीमैत्री कार्यक्रम नआएकोले सहकारीहरुले कृषि लगानी बढाउनु पर्ने अध्यक्ष महर्जनको जोड थियो । मुक्तिनाथ सहकारी कृषि बहुउद्देश्यीय सहकारी भएकोले कृषिका विविध पाटाहरुलमा जिल्लाभरी काम गर्न पनि सुझाब दिनुभयो । अध्यक्ष महर्जनले सहकारीले कृषि संगै धार्मिक तथा पर्यटन क्षेत्रमा पनि लगानी बढाउन सुझाव दिनुभयो ।
कार्यक्रममा सहकारीका सल्लाहकार हरी रायमाझीले सहकारी नाफा मुखी नभई शेयरसदस्य केन्द्रित सेवामुखी भावनाले काम गर्नुपर्नेमा जोड दिनुभयो । आफै बचत गर्ने, आफै नियम बनाउने, आफै कारोवार गर्ने, सहयोग र एक अर्कामा सहकार्य गर्ने गरी सहकारीले काम गर्दै आएकोले पनि सहकारीको महत्व निकै हरको बताउनुभयो । सल्लाहकार भिमसेन कार्कीले सहकारीले ठुलो लगानी गर्नुभन्दा स सानो क्षेत्रमा लगानी गरी धेरै सदस्यलाई सेवा दिनुपर्नेमा जोड दिनुभयो । मुक्तिनाथ सहकारीले कृषि क्षेत्रलाई नै लक्षित गरेर काम गर्दै आएको भन्दै आगामी दिनमा पनि कृषि लाई केन्द्रित गरेर अघि बढ्न सल्लाहकार कार्कीले आग्रह गर्नुभयो । नेपालको प्रमुख आयश्रोत कृषि भएकोले सहकारीले कृषिका विभिन्न पाटाहरु लाई केन्द्रित गरेर काम गर्नुपर्नेमा उहाँको जोड थियो । कार्यक्रममा शेयर सदस्य कृष्ण पोखरेल, चिरञ्जीवी ढुङ्गाना, हुमा सुर्यवंशी लगायतले सहकारीको कार्यक्षेत्र जिल्ला भरी नै रहेको र कृषि बहुउद्देश्यीय भएकोले पनि उद्धेश्य अनुसार काम गर्नुपर्नेमा सुझाव दिए । साधारणसभामा अध्यक्ष मोहन प्रसाद श्रेष्ठले बार्षिक प्रतिबेदन, सचिव शंकर भण्डारीले सांगठनिक र कोषाध्यक्ष विनोद पंन्थीले आर्थिक प्रतिवेदन प्रस्तुत गर्नुभएको थियो । सहकारीका अध्यक्ष मोहन प्रसाद श्रेष्ठको अध्यक्षतामा भएको कार्यक्रममा उपाध्यक्ष देव बहादुर पचभैयाको स्वागत र कोषाध्यक्ष विनोद पंन्थीको संचालनमा कार्यक्रम भएको हो ।
अध्यक्षमा पचभैया निर्वाचित
यसै बिच मुक्तिनाथ कृषि बहुउद्देश्यीय सहकारी संस्था लिमिटेडको तेस्रो अधिवेनले देव बहादुर पचभैयाको अध्यक्षतामा नयाँ कार्यसमिती चयन गरेको छ । अध्यक्ष पचभैया संस्थापक सचिब तथा यस अघिका उपाध्यक्ष समेत रहनुभएको थियो । अधिबेशनले कार्यसमितीको उपाध्यक्षमा विनोद पंन्थी, सचिवमा शंकर भण्डारी, कोषाध्यक्षमा समिरमान सिंह निर्वाचित हुनुभएको छ ।
समितीको सदस्यमा चिरञ्जीवी ढुङ्गाना, राम प्रसाद श्रेष्ठ, उत्तम कुमार बज्राचार्य, विमला शाक्य बज्राचार्य र विनायक महर्जन निर्वाचित हुनुभयो । लेखा समितीको संयोजकमा पर्शुराम सापकोटा, सदस्यमा प्रविन बज्राचार्य र सुनिल कुमार बस्याल निर्वाचित हुनुभयो । नव निर्वाचित समितिलाई निर्वाचन अधिकृत एवम् अधिबक्ता शिव प्रसाद देबकोटाले पद तथा गोपनियताको सपथ खुवाउँदै प्रमाणपत्र बितरण गर्नुभयो । कार्यक्रममा नवनिर्वाचित अध्यक्ष देब पचभैयाले सहकारीको उद्धेश्य अनुसार जिल्लाका अन्य सहकारीसंगै मिलेर अघि बढ्ने बताउनुभयो ।