संरक्षण र प्रचारप्रसारको अभावमा ओझेलमा रहेको मगर राजाको राजधानी पाल्पाको बलिहाङ दरबार

पाल्पा, मंशिर ४
मगर राजाको राजधानीको रुपमा परिचित ऐतिहासिक पाल्पाको बल्ढेङ्गढीमा रहेको बलिहाङगढी दरबार संरक्षण र प्रचारप्रसारको अभावमा ओझेल परेको छ । पाल्पाको सदरमुकाम तानसेन देखि झण्डै ५० किलोमिटर पश्चिमदक्षिण र रुपन्देहीको सालझण्डी देखि १५ किलोमिटर उत्तरमा पर्ने बलिहाङगढी दरबार ओझेलमा परेको हो । विक्रम सम्वत १४५० देखि १८०९ सम्म मगरातको राजधानीको रुपमा रहेको हालको बल्ढेङगढी क्षेत्रमा अहिले पनि बलिहाङ राजाको राजदरबारको अवशेष देख्न पाइन्छ । मगरको विशाल राज्य त्यतिखेर सञ्चालनमा रहेको कुरा इतिहासमा पाइएपनि व्यवहारिक रुपमा यसको सोधीखोजी हुन सकेको छैन । भग्नावशेष अवस्थामा रहेको बलिहाङगढी दरबार क्षेत्र वरीपरी अहिले पनि पुरानो दरबारको अवशेष इनार,युद्ध मोर्चाहरु, रानीवन, रानीकुवा, राजाले प्रयोग गरेको त्यतिखेरको चर्पी र मन्दिर रहेका छन् ।

अहिले त्यस क्षेत्रमा स्थानीयहरुले देवताको मन्दिर बनाई पूजाआजा गर्दै आएका छन् । अति सुन्दर, रमणीय डाँडाको चुचुरोमा रहेको दरबार क्षेत्रमा पुगेपछि जो कोहीलाई पनि स्वर्गमा पुगेको आनन्द आउने त्यहाँ आउने पर्यटकहरुले समेत बताउने गरेका छन् ।