आज ४२ औ मगर एकता दिवस , मगर संघ र भातृ संस्थाहरुले विविध कार्यक्रमका साथ मनाउँदै , विभिन्न स्थानमा स्थानीय विदा


पाल्पा, फागुन १५
आज ४२ औ मगर एकता दिवस , मगर संघ र संघका भातृ संस्थाहरुले विविध कार्यक्रमका साथ देश तथा विदेशमा समेत विभिन्न कार्यक्रमको आयोजना गरी मनाउँदैछन् । विभिन्न जिल्लाका स्थानीय तहहरुले दिवसका अवसरमा स्थानीय विदा दिएका छन् ।
२०३९ साल फागनु १५ गते स्वर्गिय हेम बहादुर पुनको अध्यक्षतामा तनहुँमा नेपाल लाङ्घाली परिवार संघको प्रथम अधिबेशन भएको थियो । यसैको संझनामा मगर संघ र यस संग सम्वन्धित संघ सँस्थाहरुले एकता दिवसको रुपमा बिभिन्न कार्यक्रमको आयोजना गरेका हुन् । मगर एकता, भाषा, संस्कृतिको रक्षा र अधिकार प्राप्तीका लागी स्थापना भएको लाङ्घाली परिवारसंघ, पछि नेपाल मगर संघमा परिवर्तन भएको मगर संघका संस्थापक महासचिब सुरेश आले मगरले जानकारी दिनुभयो । मगर संघका पूर्ब केन्द्रिय अध्यक्ष नबिन रोकामगरका अनुसार २०१२ सालमै मगर समाज सुधार समितिको नाउँमा गुल्मीको भार्सेमा मगरहरुको पहिलो संगठन बनेको भनिएपनि मगर संघले २०३९ साल फागुन १५ लाई नै संघको स्थापना दिवसको रुपमा मनाउँदै आएको छ ।
दिवस मनाउँन पाल्पाका सवै पालिकामा स्थानीय विदा

फागुन १५ को मगर एकता दिवस मनाउँन पाल्पाका सवै पालिकाहरुले मंगलबार स्थानिय विदा दिएका छन् । ४२ औं मगर एकता दिवसका अवसरमा पाल्पाका दुई नगरपालिका र आठ स्थानीय तहले स्थानीय बिदा दिएका हुन् । तानसेन र रामपुर नगपालिका संगै
बगनाँसकाली गाउँपालिका, निस्दी, माथागढी, तिनाउ, रैनादेवी छहरा, रम्भा, रिब्दीकोट र पूर्वखोला गाउँपालिकाले आज स्थानीय बिदा दिएका हुन् । बिदाका दिन पालिकाभित्रका सार्वजनिक निकाय, संघसंस्था, शैक्षिक संघसंस्था लगाएतका सरकारी कार्यालयहरु बन्द रहने बिज्ञप्ती मार्फत जानकारी दिएका छन् । पाल्पा मगर समुदायको बाहुल्य रहेको जिल्ला हो ।
मगर संघ स्थापना भएको दिनको संझनामा मनाउँदै आएको मगर एकता दिवसले गुमेको मगरात भूमि पुनःस्थापना गराउन, भाषिक सांस्कृतिक अधिकारहरु निश्चित गराउन, पहिचानका आधारमा राज्यको सबै तह र तप्कामा समानुपातिक समावेशी प्रतिनिधित्व सुनिश्चितताका लागि भएका आन्दोललाई थप ऊर्जा पुग्ने मगर संघका नेताहरुले जनाएका छन् । मगर संस्कृतिमा आधारित कला, भाषा, भेषभूषाको संरक्षण एवं सम्बद्र्धन गर्ने उद्देश्यले दिवस मनाइने मगर संघ, पाल्पाका अध्यक्ष शान्ती झेडीले जानकारी दिनुभयो । जिल्लाका सवै पालिकामा मगर संघ, आदिवासी जनजाति महासंघ लगाएतका आयोजनामा गरिने कार्यक्रममा मगर समुदायमा प्रचलित झ्याउरे, सालैजो, कृष्ण चरित्र ठुलो नाच, ठाडो भाका, यानीमाया लगाएतका विभिन्न झाँकीको प्रस्तुति रहने अध्यक्ष झेडीको भनाई छ । दिवस मनाउने स्थलमा मगरी खानाका परिकार बिक्री तथा प्रर्दशनी समेत गरिने आयोजकले जनाएका छन् ।

यहाँ प्रकाशित कुनै समाचारमा तपाईंको गुनासो भए हामीलाई flashnepalnews@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ ।

Leave a Reply

Your email address will not be published. Required fields are marked *